Concello de Verín

O alcalde de Verín, Gerardo Seoane, a presidenta do Consello Regulador, Asunción Rodríguez, e a concelleira de cultura, Emilia Somoza, presentaron esta mañá as actividades que se desenvolverán no marco da décima edición desta feira

A Feira do Viño da Denominación de Orixe Monterrei, que se celebrará en Verín entre os vindeiros 7 e 9 de agosto, contará coa participación de 16 das 24 bodegas que conforman a D.O, seis máis das que tomaron parte en 2014. Trátase dun éxito de adhesión sen precedentes na historia deste foro vinícola, que este ano acada a súa décima edición. O acto de inauguración  terá lugar as 20,00 horas do 7 de agosto na Alameda de Verín, escenario no que se desenvolverá a Feira neste ano 2015.

Logo da inauguración, tras o pregón e o percorrido das autoridades polos stands participantes, a exaltación da Denominación de Orixe Monterrei trasladarase a igrexa da Mercé de Verín, un dos referentes culturais da vila, onde se procederá á imposición de medallas a catro novos membros da Confraría dos Viños de Monterrei.

Estes datos foron desvelados esta mañá no decurso dunha rolda de prensa ofrecida polo alcalde de Verín, Gerardo Seoane Fidalgo, e a presidenta do Consello Regulador da Denominación de Orixe Monterrei, Asunción Rodriguez Zarraquiños. Neste marco, aludiuse ao cambio de ubicación da Feira como o lugar máis idóneo para responder ás demandas dun maior número de expositores. Xunto a isto, o alcalde verinés e a presidenta da D.O de Monterrei fixeron un chamamento ao público para que se achegue ata Verín, nas datas nas que se celebra a Feira, a coñecer de primeira man a singularidade dos viños da zona. Neste sentido, a  organización confía en superar a cifra de 15.000 degustacións rexistrada o ano pasado.

Paralelamente, na rolda de prensa presentouse o cartel divulgativo da X edición da Feira do Viño, un traballo que correu a cargo do deseñador local Jorge Godás e indicouse o horario de apertura dos stands: venres 7 de 20.00 a 23.00 horas; sábado 8 de 12.00 a 14.30 h e de 19.00 a 24.00 h; e domingo 9 de 11.00 a 14.30 h. e de 19.00 a 23.00 h.

Axenda de actos

Gastronomía, música e viño xuntaranse un ano máis no marco da Feira do Viño da D.O de Monterrei. Así está previsto, segundo confirmou na rolda de prensa a concelleira de cultura de Verín, Emilia Somoza, que a inauguración da Feira estea amenizada pola Banda de Gaitas do Concello de Verín.

Na xornada do sábado 8, na Alameda e coincidindo cos stands da tarde, proponse unha actividade dirixida fundamentalmente aos cativos: a ludoteca infantil. Mentres os máis pequenos gozan con xogos infantís, sempre atendidos por monitores, os adultos poderán degustar as diferentes variedades dos viños de Monterrei. O recinto da feira estará amenizado pola Charanga Ideal e os asistentes presenciarán a chegada  dunha concentración de bicicletas de época que rematarán o seu paseo no espacio da Feira do Viño. Xa pola noite, o público contará coa verbena Primera Línea.

O domingo 9 de agosto, a Feira do Viño arrinca, pola mañá, cunha sesión vermú e a actuación da Disco Móvil Jorge. Pola tarde, coa apertura dos stands, os asistentes volverán a contar coa ludoteca infantil e, nesta ocasión, vivirán un momento enxebre coa actuación de Candaira. Cánticos, baile e pandeireta acompañarán aos asistentes ata a clausurado evento, momento no que volverá a Disco Móvil Jorge para despedir a Feira do Viño bailando.

Bodegas participantes e colaboradores

As 16 bodegas participantes nesta X edición da Feira do Viño de Monterrei son as seguintes:

• Bodegas Ladairo S.L,
• Bodega Pazos del Rey S.L
• Adegas Pazo das Tapias S.L
• Gargalo S.L
• José Luis Gómez Ibáñez
• Adega Crego e Monaguillo S.L
• O Cabildo S.L
• Quinta do Buble S.L
• Terras do Cigarrón S.C.G
• Triay Adegas de Oimbra
• Boo Rivero SAT
• Manuel Guerra Justo
• Concepción Paradela Martínez
• Bodega Pazo de Valdeconde S.L
• Bodega Tabú S.L.N.E
• Franco Basalo S.L.U

Na rolda de prensa, o alcalde de Verín e a presidenta do Consello Regulador quixeron agradecer a implicación de todos os bodegueiros participantes e a das institucións e entidades colaboradoras: Xunta de Galicia, Deputación de Ourense, MAGRAMA, Fondo Europeo Agrícola de Desenvolvemento Rural (FEADER), concellos de Oímbra, Monterrei, Castrelo do Val, Riós e Vilardevós, AECT e Portas de Galicia.

 Sobre a D.O Monterrei

A de Monterrei é unha das cinco denominacións de orixe vinícolas galegas. Confórmana 24 bodegas do val de Monterrei, que abarca os municipios de Verín, Monterrei, Vilardevós, Ríos, Oimbra e Castrelo do Val. A superficie cultivada nesta D.O ocupa unha superficie de 467 hectáreas de territorio nas que traballan 381 viticultores. En 2014, a produción total de Monterrei acadou os 2,8 millóns de quilos de uva e un 17% da mesma exportouse a diferentes lugares do mundo. De feito, os viños de Monterrei están presentes en 24 países diferentes.