O Concello de Verín construirá unha nova escola infantil municipal cun investimento de 1.162.000 euros

A infraestructura, que se licitará a finais de marzo, estará ubicada nunha parcela municipal e contará con novas liñas de financiamento que permitirán cubrir ata o 97% do investimento.

Verín, 10 de marzo de 2026. O Concello de Verín construirá unha nova escola infantil municipal de 0 a 3 anos cun investimento previsto de 1.162.000 euros, un proxecto que contará cun financiamento externo estimado de ata o 97 % do total, polo que non suporá unha carga significativa para as arcas municipais.

A nova infraestrutura educativa situarase nunha parcela municipal na Avenida de Portugal número 120, no espazo das actuais piscinas descubertas, unha localización que permitirá desenvolver unha escola infantil moderna, deseñada especificamente para a atención á primeira infancia.

Neste contexto, o goberno municipal decidiu renunciar á subvención concedida pola Xunta de Galicia, ao considerar que o importe destinado á execución da obra resultaba claramente insuficiente para garantir a correcta construción dunha infraestrutura destas características.

A axuda concedida ascendía a 700.000 euros, mais só 507.000 euros estaban destinados á execución da obra, mentres que o resto correspondía a gastos de funcionamento. Isto supuña que o importe realmente dispoñible para a construción da escola infantil non permitía asegurar a viabilidade real do proxecto nin a súa correcta execución.

Ademais, o modelo previsto na convocatoria autonómica financiada con fondos europeos non se axustaba ás necesidades reais do proxecto nin á planificación educativa do municipio, tanto polo importe dispoñible para a construción como polas condicións temporais e administrativas establecidas.

A licitación da obra está prevista para finais do mes de marzo, unha vez completada a planificación técnica e urbanística do proxecto, mentres o Concello continúa traballando na captación de novas liñas de financiamento de maior contía, entre elas programas europeos como os fondos FEDER.

Cómpre lembrar que a propia Xunta de Galicia renunciou recentemente a 22 millóns de euros de fondos europeos destinados tamén á creación de prazas de escolas infantís ao considerar que as condicións do programa non se axustaban ás súas necesidades. Neste sentido, o Concello de Verín entende que, do mesmo xeito que a administración autonómica tomou esa decisión ao considerar insuficiente ou pouco axeitado o programa, tamén o goberno municipal debe actuar con responsabilidade cando unha convocatoria non garante a viabilidade real dun proxecto desta envergadura.

No caso de Verín, o Concello optou por desenvolver un proxecto máis ambicioso e mellor adaptado ás necesidades da vila, que permitirá construír unha escola infantil municipal nunha parcela de titularidade municipal e deseñada especificamente para o seu uso educativo.

O goberno municipal reafirma así o seu compromiso coa creación de novas prazas públicas de educación infantil en Verín, apostando por un proxecto viable, ben planificado e cun financiamento sólido que garanta a súa execución e sustentabilidade a longo prazo.