O Concello de Verín abre procesos de contratación temporal para profesorado de Frauta Traveseira e Violín

Emprego público Verín, 9 de setembro de 2026

O prazo para presentar as solicitudes permanecerá aberto ata o 13 de setembro de 2026

O Concello de Verín mantén aberto o prazo de presentación de solicitudes para dous procesos selectivos destinados á contratación de persoal laboral temporal para o Conservatorio de Música de Verín, correspondentes ás especialidades de Frauta Traveseira e Violín, ambas as dúas a xornada parcial.

Praza de Profesor/a de Frauta Traveseira

No caso de Frauta Traveseira, convócase unha praza de profesor/a. Entre as titulacións admitidas figuran:

• Título de Graduado/a en Música na especialidade de Interpretación, con Frauta Traveseira como instrumento principal.
• Título Superior de Frauta Traveseira (LOXSE).
• Título de Profesor Superior ou de Profesor de Frauta Traveseira do Plan de 1966.
• Título Profesional de Frauta Traveseira do Plan de 1942.

Praza de Profesor/a de Violín

Para a especialidade de Violín, convócase igualmente unha praza de profesor/a a xornada parcial. As titulacións esixidas son:

• Título Superior de Violín.
• Título de Profesor Superior de Violín.
• Título Superior de Interpretación no itinerario de Violín.
• Grao en Interpretación no itinerario de Violín.

Procedemento selectivo

En ambos os procesos, o procedemento selectivo será o establecido nas bases xerais de contratación para o persoal laboral temporal e nas respectivas bases específicas. Se o Concello o solicita, as persoas seleccionadas deberán ter tamén dispoñibilidade para impartir outras disciplinas para as que conten coa correspondente habilitación, formación musical non regrada ou exercer cargos directivos.

Toda a documentación necesaria para participar nos procesos, incluídos os anexos, bases e requisitos específicos, pode consultarse na Sede Electrónica do Concello de Verín, no apartado Taboleiro de Anuncios – Emprego Público, así como fisicamente no taboleiro de anuncios municipal.