Creadores e creadoras locais presentan as súas obras no marco do Festival Internacional de Curtas de Verín
11/09/2023
Directores convidados pola organización do FIC Vía XIV a Verín coñecen o potencial do territorio amparado baixo o selo de calidade da D.O. Monterrei
13/09/2023
- Onte tivo lugar no Auditorio de Verín o acto oficial de inicio de curso 2023/2023 e a recepción do alumnado de primeiro de grao elemental.
Verín, 12 de setembro de 2023. Onte tivo lugar no Auditorio de Verín a inauguración do ano lectivo no Conservatorio Profesional de Música de Verín. Este acontecemento non só marcou o inicio dun novo ciclo educativo, senón que tamén foi o momento elixido para presentar oficialmente ao novo director do centro, José Luís Tielas Santiago. A recepción estivo presidida polo tenente de alcalde de Verín, Diego Lourenzo, e pola concelleira responsable da área de Cultura, Conservatorio, Festexos e Turismo, Samanta Barreira.
O nomeamento de Tielas Santiago como director do Conservatorio foi recibido con gran entusiasmo pola comunidade educativa e cultural de Verín. A súa ampla experiencia e dedicación á música prometen contribuír significativamente ao enriquecemento do Conservatorio e ao desenvolvemento de futuros talentos musicais.
Un dos momentos máis destacados da xornada foi a benvida ao novo alumnado e as súas familias que conforman o primeiro curso de grao elemental. Este é un paso crucial no camiño destes mozos músicos cara a unha formación académica e artística de calidade. Para dar inicio á súa travesía musical, realizouse unha visita guiada polas modernas e equipadas instalacións do Conservatorio, onde poderán desenvolver as súas habilidades e talentos.
A inauguración do ano lectivo no Conservatorio Profesional de Música de Verín representa un fito importante na promoción e fomento da educación musical na nosa comunidade. O compromiso das autoridades locais, o apoio dos pais e familias, e a paixón dos estudantes son a base dun futuro musical brillante en Verín.
O tenente de alcalde do Concello de Verín, Diego Lourenzo, quixo recordar que este logro é o resultado dunha aposta firme do goberno municipal que asumiu o cargo en 2015, que decidiu outorgar a importancia e o enfoque necesarios a esta nova e específica área de goberno.
«Quero destacar que a miña compañeira Samanta Barreira conta con ampla experiencia e unha sensibilidade especial cara ao mundo da cultura musical. Tamén estamos a estrear un novo director
para o conservatorio, alguén con unha dilatada experiencia e coñecementos na dirección de bandas, polo que esperamos que achegue un novo dinamismo. É fundamental lembrar que este centro non só é vital para o tecido social da nosa vila, senón que tamén xoga un papel significativo na administración municipal e, polo tanto, no benestar de todas as nosas veciñas», explicou Diego Lourenzo.
«É un orgullo para o Concello dar comezo ao novo curso do Conservatorio, que xa inicia o seu 4º ano profesional neste 2023/2024», sinalou Samanta Barreira, É todo un logro e unha auténtica satisfacción contar na nosa vila cun centro que non só se mantén senón que crece en oferta formativa».
«Tamén queremos agradecer o traballo e profesionalidade de todas as persoas que o fan posible, dende o equipo docente, ANPA e sobre todo, ao alumnado que aprende, goza e nos fai sentir a música a través do seu talento e esforzo», finalizou Barreira.
Pola súa banda, o novo director do centro, José Luis Tielas, comprometeuse a traballar para dar unha nova perspectiva ao Conservatorio, algo máis adaptado á realidade social e cultural da vila do Támega. «O noso obxectivo é formar futuros profesionais en Verín e elevar o nivel musical da nosa vila Queremos ampliar as competencias e actividades extra curriculares, ofrecendo unha variedade de oportunidades para os mozos en Verín. Adaptaremos os currículos para facer a súa experiencia o máis agradable posible, motivándoos a gozar verdadeiramente da música».
