O Concello de Verín consolida o modelo de éxito da Feira do Lázaro cunha nova edición de sobresaliente

• A organización xeral acada un 9,41 e melloran indicadores clave como limpeza, stands e ubicación.

• 9 de cada 10 os expositores amosan a súa vontade de repetir na próxima edición.

Verín, 24 de marzo de 2026. A Feira do Lázaro 2026 pecha unha nova edición reafirmándose como un dos grandes motores comerciais e sociais da comarca de Monterrei, cunha valoración global de sobresaliente por parte das persoas expositoras, segundo os datos recollidos nas enquisas realizadas polo Concello de Verín.

A organización xeral acada unha puntuación media de 9,41, consolidando o alto nivel do evento e mellorando en aspectos clave como a limpeza (9,9), os stands (9,68) e a ubicación (9,68), que se sitúan entre os mellor valorados desta edición. Tamén destacan positivamente o horario (9) e a promoción e difusión (8,76), evidenciando o esforzo organizativo e comunicativo realizado.

En palabras do concelleiro de Feiras, Manuel Lorenzo, «estes datos reflicten o compromiso colectivo de toda a vila, desde os servizos municipais ata os expositores e a veciñanza, que fan posible que o Lázaro siga medrando ano tras ano como unha cita imprescindible».

Alta fidelización e intención de retorno
Un dos indicadores máis relevantes deste balance é a fidelización dos participantes. O 94% das persoas expositoras manifestan claramente a súa intención de repetir, o que supón que 9 de cada 10 participantes queren volver formar parte da feira.

Este dato confirma o impacto positivo da Feira do Lázaro tanto a nivel organizativo como comercial, consolidándose como unha plataforma eficaz para a promoción e venda de produtos.

Balance comercial
No ámbito económico, as vendas obtiveron un aprobado alto cunha valoración de 6,64, mentres que a programación de actividades un 8,21, e a música, un 6,60.

Desde o Concello subliñan que estes datos serán fundamentais para seguir perfeccionando o evento: «Analizamos cada resultado con detalle para introducir melloras e responder ás necesidades reais dos participantes», destacou Lorenzo.

Recoñecemento á excelencia expositiva
No marco da feira tamén se fixo entrega do Premio ao Mellor Stand Lázaro 2026, que recaeu en Valdabella Group, representado por Sonia González Rodríguez, do sector da alimentación, destacando pola calidade e presentación dos seus produtos, entre os que se atopan mel, derivados, licores, hidromel e cervexa artesanal.

Un evento clave para a dinamización local
A Feira do Lázaro 2026 reafírmase así como un espazo de encontro, dinamización económica e identidade colectiva, que continúa evolucionando grazas á implicación do tecido comercial, institucional e social de Verín.

O Concello xa traballa na próxima edición co obxectivo de seguir elevando o nivel dunha cita que, ano tras ano, consolida o seu papel como referente no sur da provincia de Ourense.