Verín distingue cinco negocios locais na primeira edición dos Premios ao Comercio

Verín, 5 de outubro de 2026. O Auditorio de Verín acolleu o pasado venres, 2 de outubro, a gala da primeira edición dos Premios ao Comercio de Verín, unha iniciativa do Centro Comercial Urbano AEVER para recoñecer o traballo dos establecementos locais e das persoas que os impulsan. O acto reuniu a mais e douscentos comerciantes, representantes do tecido asociativo, autoridades e veciñanza nunha xornada que combinou a entrega de galardóns presentado pola actriz galega Iria Sobrado con espectáculo e música en directo a cargo do grupo Mr Cool.

Os premios, concedidos tras a valoración dun xurado integrado por catro membros, distinguiron cinco ámbitos da actividade comercial. Xoguetería Kuqui recibiu o recoñecemento á Renovación ou Relevo Xeracional, categoría na que tamén foron finalistas Pato Joyeros e Modas San José.

O premio ao Compromiso coa Comunidade e Identidade Local recaeu en Chabela Regalos, que compartiu candidatura coa Clínica Veterinaria San Roque e Xamonería Antonio Martín. Na categoría de Novo Comercio, o establecemento galardoado foi Marise Salgado, xunto ás finalistas As Pescadeiras e Tatiana Estética Avanzada.

Pola súa banda, UnoUno obtivo o premio á Innovación Comercial de Proximidade, ao que tamén optaban Abeloura Boutique e Xamonería Antonio Martín. O recoñecemento á Mellor Comunicación Comercial de Proximidade foi para Santiveri, nunha categoría que completaron a Clínica Veterinaria San Roque e Coco Shoes.

O premio honorífico recaeu no histórico Almacenes Recaredo Romeo.

A gala contou cunha ampla representación municipal, encabezada polo alcalde de Verín, Gerardo Seoane, encargado de entregar o premio á innovación. Participaron tamén, entre outras autoridades, o director xeral de Comercio e Consumo, Gabriel Alén Castro; o deputado provincial José María Lago; e o presidente do Inorde, Rosendo Luis Fernández, que entregaron os galardóns de relevo xeracional, compromiso coa comunidade e novo comercio, respectivamente.

Durante a súa intervención, Gabriel Alén recoñeceu o labor de AEVER e destacou o esforzo diario das persoas que están detrás do comercio de proximidade, así como a súa contribución á identidade de Verín e á actividade das súas rúas.

Con esta primeira edición, AEVER deu visibilidade a diferentes formas de contribuír ao futuro do sector: a continuidade dos negocios, a apertura de novos establecementos, a vinculación coa comunidade e a incorporación de novas ideas e ferramentas de comunicación.

A iniciativa contou coa colaboración do Concello de Verín e integrouse na campaña extraordinaria de AEVER cofinanciada pola Xunta de Galicia a través de Comercio Galego, unha das cinco seleccionadas na convocatoria de apoio aos centros comerciais abertos.