O Concello aposta por un modelo educativo integrador: gardería, colexio e servizos nun mesmo espazo
16/06/2025
O Concello oferta un curso oficial, gratuíto para desempregados, de socorrismo en instalacións acuáticas
17/06/2025
Verín, 17 de xuño de 2025. O vindeiro sábado 21 de xuño, ás 17:30 horas, o Auditorio Municipal de Verín será o escenario dun espectáculo único e inesquecible para o público infantil: «Bibopalula», unha emocionante aventura teatral cargada de música, natureza e fantasía, pensada especialmente para nenas e nenos de entre 4 e 8 anos.
Protagonizado pola intrépida Ava, unha apaixonada observadora de paxaros e defensora da vida do bosque, o espectáculo mergulla ás pequenas e pequenos espectadores nunha viaxe chea de descubrimentos naturais, retos inesperados e cancións orixinais que xa forman parte do repertorio máis querido polos seguidores de Bibopalula. A través das aventuras da Banda do Bosque, os personaxes Robin, Carpin, Pegui e Merli deberán superar obstáculos e desfrutar dos segredos que agacha a natureza para atopar un misterioso tesouro encomendado polo Señor Moucho.
O espectáculo inclúe coreografías, efectos especiais e unha iluminación espectacular, que fan de “Bibopalula” unha experiencia teatral inmersiva e novidosa en Galicia.
A produción corre a cargo de Ainé, compañía referente na creación de espectáculos en galego, responsable de grandes éxitos como Somos Criminais ou Fariña. Este proxecto conta co apoio da Xunta de Galicia, a través das súas subvencións á creación escénica, así como coa colaboración de Deleite e do Concello de Verín, que continúa a apostar pola cultura e o teatro familiar como elementos clave na programación sociocultural da vila.
As entradas xa están á venda a partir de 13 euros, e poden adquirirse a través da plataforma www.ataquilla.com
