Verín presenta os seus primeiros Premios ao Comercio, organizados por AEVER coa colaboración do Concello
14/09/2026
Verín acollerá o vindeiro domingo 20 de setembro unha nova actividade do programa Andainas Xeodestino 2026, nesta ocasión coa celebración da Ruta da Auga, un percorrido circular que permitirá descubrir a pé diferentes espazos vencellados á auga, ao patrimonio termal e á contorna natural do municipio.
A andaina partirá ás 09:00 horas da Praza do Concello de Verín e contará cun percorrido de aproximadamente 16 quilómetros, cunha dificultade media, un desnivel acumulado de 100 metros e unha duración estimada de catro horas.
Ao longo do itinerario, as persoas participantes poderán coñecer diferentes puntos de interese como a Fonte de Cabreiroá, a Ermida de San Antón, a Fonte do Sapo, o Balneario de Caldeliñas, a praia fluvial da Pousa e o sendeiro do río Támega.
A proposta permitirá combinar actividade física, natureza e patrimonio a través dun percorrido que pon o foco na estreita relación histórica de Verín coa auga mineral e o termalismo, así como nos mananciais e espazos naturais que forman parte da identidade e da paisaxe local.
Esta actividade intégrase no programa Andainas Xeodestino 2026, impulsado a través do Xeodestino Verín-Monterrei, do que forma parte o Concello de Verín. A iniciativa busca favorecer o coñecemento e a posta en valor dos recursos naturais, culturais e patrimoniais do territorio, achegándoos tanto á veciñanza como ás persoas visitantes.
As persoas interesadas en participar deberán realizar a súa inscrición a través de Celtia Travel. Para ampliar información están dispoñibles os teléfonos 635 482 477 e 629 858 134.
