Os catro concelleiros do grupo municipal do Partido Popular renuncian ás súas actas no Concello de Verín
25/08/2026
O acordo formalizado coa Diocese permite avanzar na adquisición do 95 % dos terreos necesarios para unha actuación que abranguerá uns 4.500 m² no corazón da vila.
O Concello contempla un investimento global de 475.000 euros na adquisición de propiedades da Diocese e de particulares, dos que xa foron executados, con este último acordo, 437.000 euros.
Verín, 27 de agosto de 2026. O Concello de Verín e a Diocese de Ourense formalizaron hoxe un novo e importante paso para facer realidade a transformación do entorno da igrexa de Santa María a Maior, unha actuación estratéxica para a recuperación e posta en valor do casco histórico da vila.
O alcalde de Verín, Gerardo Seoane Fidalgo, e o representante da Diocese de Ourense, Raúl Afonso González, formalizaron o contrato de compravenda, doazón e aceptación das parcelas incluídas no acordo para a mellora do entorno inmediato de Santa María a Maior.
En concreto, o acordo contempla a compra por parte do Concello de dúas parcelas por un importe total de 275.653,89 euros, así como a doazón dunha terceira parcela por parte da Diocese, valorada en 98.547,70 euros, que se incorporará ao patrimonio municipal unha vez cumpridas as condicións establecidas.
A operación abrangue a práctica totalidade das propiedades da Diocese neste ámbito, exceptuando o propio edificio da igrexa e un pequeno solar orientado cara á rúa Alameda. Sumada ás adquisicións realizadas a outros propietarios particulares, esta actuación permite ao Concello dispoñer xa do 95 % dos terreos necesarios para desenvolver o proxecto, quedando pendente un 5 % que se prevé completar nos próximos días.
Un ámbito de 4.500 metros cadrados no corazón de Verín
O conxunto da actuación abrangue unha superficie aproximada de 4.500 metros cadrados e contempla un investimento global de 475.000 euros para a adquisición dos terreos, tanto os pertencentes á Diocese como os de titularidade privada.
Desta cantidade -e tendo en conta esta última operación- xa foron executados un total de 437.000 euros, o que evidencia o avanzado estado do proceso de adquisición necesario para poder desenvolver posteriormente a transformación integral deste ámbito.
A actuación contempla, nunha primeira fase a desenvolver nos próximos anos, a creación dunha gran zona verde pública, concibida como un novo espazo de encontro, paseo e convivencia para a veciñanza.
O proxecto permitirá así combinar recuperación urbana, creación de espazo público, mellora da mobilidade peonil, novas zonas verdes e posta en valor patrimonial, favorecendo unha transformación profunda deste punto estratéxico do casco vello.
A intervención está contemplada no Plan Especial de Protección e Reforma Interior (PEPRI) do casco vello de Verín, aprobado inicialmente e actualmente pendente da súa aprobación definitiva.
«É unha aspiración histórica de Verín»
O alcalde de Verín, Gerardo Seoane, destacou a importancia de alcanzar este punto tras un complexo proceso de negociación e adquisición dos terreos.
«É unha aspiración histórica de Verín que a igrexa de Santa María a Maior conte cun entorno digno, aberto e integrado na vila. Estamos falando dun dos espazos con maior valor patrimonial do noso casco histórico e queremos que deixe de ser unha zona pechada para converterse nun lugar para desfrutar, pasear e convivir», sinalou Seoane.
Segundo Seoane, «a futura zona verde permitirá recuperar este espazo para a veciñanza, mellorar a conexión coa Alameda e, ao mesmo tempo, poñer en valor a igrexa e todo o seu entorno. Trátase de abrir o casco vello á cidadanía, recuperar patrimonio e gañar espazo público para Verín».
