Verín destinará máis de 2 millóns de euros á mellora de rúas urbanas e núcleos rurais

O Pleno aproba unha operación de crédito que permitirá acometer importantes actuacións de asfaltado no casco urbano e investimentos en once núcleos rurais

O Pleno do Concello de Verín aprobou este martes a concertación dunha operación de crédito por importe de 2 millóns de euros que permitirá financiar parte das actuacións de investimento previstas no Orzamento municipal de 2026.

Entre os principais destinos desta actuación destaca un importante plan de mellora da rede viaria municipal. Segundo explicou o alcalde, Gerardo Seoane, un total de 1,2 millóns de euros destinaranse a actuacións de pavimentación e asfaltado en Verín, permitindo actuar en boa parte das rúas que precisan renovación do firme.

Ademais, outros 822.000 euros investiranse en actuacións de mellora en once núcleos rurais do municipio, incluíndo a reparación e acondicionamento de diferentes espazos e infraestruturas de uso público e pavimentacións e asfaltados.

O obxectivo destas actuacións é continuar mellorando a mobilidade, a seguridade viaria e a calidade dos servizos municipais tanto no casco urbano como nos pobos, dando resposta ás necesidades trasladadas pola veciñanza.

A operación foi adxudicada á entidade Caja Rural de Zamora e permitirá executar investimentos xa contemplados no Orzamento municipal deste exercicio.

Desde o goberno municipal destacan que este investimento supón un importante impulso para a modernización das infraestruturas municipais