O CMUS de Verín entrega os premios do sorteo “Arte e Música”
27/06/2025
Calidade, tradición e modernidade: Verín acolle a XVIII edición da súa feira vitivinícola máis emblemática
03/07/2025
Os interesados deberán inscribirse de forma presencial na Oficina Municipal de Información Turística de Verín ata o 31 de xullo
Verín 2 de xullo do 2025. O Concello de Verín informa que o prazo de inscrición para participar no tradicional Desfile de Entroidos de Interese Turístico en Santiago de Compostela, que se celebrará o 6 de setembro de 2025, permanecerá aberto ata o 31 de xullo.
As persoas interesadas deberán formalizar a súa inscrición presencialmente na Oficina de Turismo de Verín, en horario de luns a venres, das 09:30 ás 14:00 horas e das 17:00 ás 19:00 horas.
Cada grupo de Entroido de cada concello poderá inscribir un máximo de 35 participantes, e a participación estará suxeita á orde de inscrición ata completar as prazas dispoñibles.
A oficina de turismo informará do lugar e hora de recollida de todos os participantes.
Programa do desfile
O desfile dará comezo o día do evento ás 10:15 horas, coa chegada dos grupos á Dársena de Xoán XXIII, onde serán recibidos por profesionais de Turismo de Galicia. A continuación, os participantes desprazaranse a pé ata a Hospedería de San Martiño Pinario, onde estarán habilitadas salas para cambiarse e descansar, con espazos separados por sexo para aqueles que necesiten maior privacidade ou ducharse ao remate do desfile.
Ás 12:15 horas, todos os grupos deberán estar xa preparados na Praza do Obradoiro, desde onde iniciarán o percorrido ás 12:45 horas, pasando por rúas emblemáticas como a rúa do Vilar, a Praza do Toural ou a rúa Nova, ata regresar á Praza do Obradoiro.
Cada grupo deberá contar cun portaestandarte que levará o cartel co nome do Entroido e do concello que representa, e tamén designar a dúas persoas encargadas de repartir os trípticos promocionais facilitados por Turismo de Galicia.
O desfile rematará ás 14:00 horas, seguido dun xantar colectivo ás 15:15 horas nos comedores da Hospedería de San Martiño Pinario. A saída dos autobuses de regreso aos lugares de orixe está prevista para as 18:00 horas.
O Concello de Verín anima a todos os membros do Entroido a participar nesta actividade de grande proxección cultural e turística, que contribúe á promoción e posta en valor dos nosos Entroidos como elementos únicos do patrimonio galego.
Para máis información:
Oficina de Turismo de Verín – Tel. 988 411 614
Email: turismo@verin.gal.
