O Concello de Verín abrirá o 23 de setembro a inscrición para o Obradoiro do Cigarrón 2026-2027

A actividade desenvolverase na Casa da Xuventude a partir do 5 de outubro e ofrecerá 24 prazas para a elaboración da careta e 20 para a confección do traxe.

Verín, 21 de setembro de 2026. O Concello de Verín abrirá do 23 de setembro ao venres 2 de outubro, ambos incluídos, o prazo de inscrición para participar no Obradoiro do Cigarrón 2026-2027. Esta iniciativa formativa está dirixida a persoas maiores de idade interesadas en aprender a elaborar a máscara completa ou algunha das súas partes, contribuíndo á conservación e transmisión dos saberes artesanais vinculados ao Entroido verinés.

Promovido polo Concello desde 1997, o obradoiro ten como obxectivo preservar as formas tradicionais do cigarrón, a figura máis representativa do Entroido de Verín. A formación aborda a elaboración dos seus elementos constitutivos, agás os compoñentes de produción industrial e o pintado da careta e da mitra.

As actividades desenvolveranse na Casa da Xuventude a partir do 5 de outubro e rematarán cando as persoas participantes e formadoras completen os obxectivos establecidos ao inicio do curso, sempre antes do Xoves de Compadres de 2027. Para cada modalidade está prevista unha sesión semanal, entre o luns e o xoves, dentro da franxa horaria das 16:00 ás 19:30 horas. Os horarios e o número de sesións poderán adaptarse de mutuo acordo, dentro das posibilidades de apertura das instalacións.

Nesta edición ofreceranse ata 24 prazas para a elaboración da careta e 20 para a confección do traxe, cun máximo de 12 e 10 participantes por grupo, respectivamente.

As persoas inscritas deberán achegar os materiais e instrumentos necesarios para desenvolver as actividades. No caso da confección do traxe, será preciso contar con coñecementos de costura con máquina, labores de punto con agulla de calcetar e tecido con agulla de gancho, ademais de levar a propia máquina de coser para traballar nela durante as sesións.

A inscrición poderá realizarse para o conxunto do obradoiro ou unicamente para unha das súas partes. Tamén se admite a participación conxunta de dúas persoas que acrediten parentesco de ata cuarto grao para elaborar a máscara completa; neste caso, unha participará na confección do traxe e a outra na realización da careta.

O prezo da inscrición será de 120 euros para o conxunto das actividades, tanto na modalidade individual como na compartida por dúas persoas con parentesco acreditado, e de 85 euros para participar exclusivamente na elaboración do traxe ou da careta.

As solicitudes poderán presentarse presencialmente no Rexistro de Entrada do Concello de Verín ou a través da Sede Electrónica municipal, no apartado «Catálogo de trámites – Competencias e servizos – Educación, Cultura e Deportes», mediante o trámite «Inscrición en actividades e cursos», a partir do mércores 23 de setembro, ás 09:00 horas. En ambos os casos será necesario achegar o formulario correspondente debidamente cuberto e o xustificante de ingreso ou transferencia bancaria. O prazo límite para inscribirse será o venres 2 de outubro, ás 14:00 horas.

Con esta iniciativa, o Concello de Verín continúa facilitando a aprendizaxe dos oficios e técnicas que permiten manter viva unha das expresións máis singulares do patrimonio cultural da vila.