O Pleno formaliza a substitución dos catro concelleiros do PP tras as renuncias dos seus anteriores representantes

Verín, 22 de setembro de 2026. O Concello de Verín celebrou esta mañá unha sesión extraordinaria e urxente do Pleno municipal na que tomaron posesión os catro novos concelleiros do grupo municipal do Partido Popular, tras as renuncias formalizadas polos anteriores representantes desta formación na Corporación.

Durante a sesión tomaron posesión das súas actas Bernardo Rodríguez Danoz, Tamara Velázquez Rivero, Benito Quiñones García e Tino Cid Lorenzo. Así mesmo, deuse conta da constitución do grupo municipal do PP, que designou como portavoz titular a Bernardo Rodríguez Danoz e como portavoz suplente a Benito Quiñones García, así como da adscrición dos seus integrantes ás diferentes comisións informativas.

Por outra banda, o Pleno aprobou, cos votos favorables do PSdeG-PSOE e do BNG e os votos en contra do PP, o expediente de recoñecemento extraxudicial de créditos por un importe total de 502.150,62 euros, correspondente a obrigas económicas pendentes.

Este expediente enmárcase no actual proceso de regularización dos pagamentos municipais, despois de que o Concello destinase este ano arredor de 3,3 millóns de euros ao pagamento de facturas a través do mecanismo estatal de pagamento a provedores.

Convenio para o FIC Verín Vía XIV 2026

A Corporación aprobou tamén, cos votos favorables do PSdeG-PSOE e do BNG e a abstención do PP, o convenio de colaboración entre o Concello de Verín e a Asociación Cultural Audiovisual Vía XIV para a celebración do FIC Verín Vía XIV 2026. O convenio establece unha achega municipal de 40.000 euros destinada á organización do décimo aniversario de devandito certame cinematográfico.

Modificación das subvencións nominativas deportivas

Finalmente, o Pleno aprobou, cos votos favorables do PSdeG-PSOE e do BNG e a abstención do PP, unha modificación das bases de execución do Orzamento municipal de 2026 relativa ás subvencións nominativas destinadas ao deporte.

A modificación permite trasladar as partidas de 1.500 euros inicialmente destinadas ao Club Ciclismo BTT Verín e ao Club Ciclismo Chinquena Racing á Escola de Danza Diversity e ao Club Val do Támega, respectivamente.

O cambio realízase coa conformidade dos clubs inicialmente beneficiarios, que este ano non desenvolverán os eventos previstos debido ao estado no que se atopa o monte tras os incendios. Deste xeito, os 3.000 euros inicialmente consignados mantéñense destinados ao fomento da actividade deportiva local, pasando a apoiar entidades que si desenvolverán actividade durante o presente exercicio.