Verín acolle unha xornada de recoñecemento ao voluntariado de Cruz Vermella de toda a provincia

O Auditorio Municipal acolleu unha xornada de convivencia e recoñecemento ao compromiso solidario das persoas voluntarias de toda a provincia

19 de setembro de 2026. O Auditorio Municipal de Verín acolleu esta mañá o XXII Encontro Provincial de Voluntariado de Cruz Vermella en Ourense, unha cita anual que reuniu a máis de 150 persoas voluntarias procedentes das diferentes asembleas comarcais da provincia nunha xornada de convivencia, recoñecemento e intercambio de experiencias.

Ao acto institucional asistiron representantes das diferentes administracións públicas, así como responsables da organización e autoridades da comarca. A inauguración correu a cargo de Gonzalo Hervera, presidente comarcal en funcións de Cruz Vermella en Monterrei, e de Diego Lourenzo, tenente de alcalde do Concello de Verín.

Durante a súa intervención, Lourenzo puxo en valor a dimensión humana e social do traballo que desenvolven diariamente as persoas voluntarias. «O voluntariado representa unha das expresións máis valiosas do compromiso coa comunidade. As administracións temos a responsabilidade de poñer en marcha recursos, servizos e políticas que melloren a vida da cidadanía, pero nunca poderemos substituír algo tan profundamente humano como acompañar, escoitar e tender a man a quen o necesita. Para Verín é un orgullo acoller este encontro e contar con persoas que deciden non permanecer indiferentes ante as necesidades dos demais», destacou o tenente de alcalde de Verín.

Pola súa banda, o presidente provincial de Cruz Vermella en Ourense, Felipe Ferreiro, destacou durante a súa intervención o valor do voluntariado como motor de transformación social e agradeceu o compromiso das persoas que colaboran día a día nos proxectos da organización, contribuíndo a dar resposta ás necesidades das persoas máis vulnerables da provincia.

O encontro serviu tamén para visualizar iniciativas de impacto social e ambiental desenvolvidas na comarca, entre elas a reforestación de máis de 12 hectáreas realizada en Guimarei, no Concello de Monterrei, así como para poñer o foco na importancia da acción local e o seu impacto a nivel global.

Recoñecementos ao voluntariado

Un dos momentos máis emotivos da xornada foi a entrega dos Recoñecementos á Acción Voluntaria, conducida por Javier Manteiga, secretario provincial de Cruz Vermella en Ourense.

Nesta XXII edición, Cruz Vermella entregou oito Diplomas de Recoñecemento á Acción Voluntaria e cinco Medallas de Bronce, co obxectivo de distinguir a traxectoria, o compromiso e a dedicación de persoas voluntarias das diferentes asembleas da provincia.

As Medallas de Bronce foron para Pablo Mosquera Otero, Gonzalo Hervera Mené, María del Pilar Vega Sánchez, José Manuel Araujo Dacosta e Manuela Dorado Domínguez.

Os Diplomas de Recoñecemento á Acción Voluntaria recaeron en Sandra Hoyos, Nieves Lara López, Alfredo Aguiar Pérez, María Montserrat Iglesias Pena, Xoan Carlos Luis Fernández, María Milagros Penín Quintas, Luis Javier Fernández Vedo e José Manuel Cortizo Estévez.

Cultura e participación

A xornada estivo marcada tamén por diferentes espazos culturais, presentados polo xornalista, locutor e actor de dobraxe Carlos Reboreda, tamén voluntario de Cruz Vermella.

A actuación musical inicial estivo a cargo de Carmen Villabril Álvarez, cantante lírica, e Ría Garrido Ruíz, pianista do Conservatorio de Verín.

Ademais, o programa reservou un espazo para o Entroido da comarca de Verín, coa participación de Rebeca André Estévez e José Carlos Cabido Sabariz, que achegaron ás persoas asistentes unha mostra dunha das tradicións culturais máis representativas da provincia.

O encontro rematou cunha actividade participativa dinamizada por Lismar Nauyoli Peña Fernández, voluntaria da asemblea comarcal e monitora do Obradoiro de bailoterapia para persoas maiores no rural.

O Encontro Provincial de Voluntariado constitúe unha das principais citas anuais de Cruz Vermella en Ourense, permitindo recoñecer o compromiso das persoas voluntarias e reforzar os vínculos entre quen dedican o seu tempo e esforzo a mellorar a vida doutras persoas.

Entrega dos Recoñecementos á Acción Voluntaria

×