O Concello de Verín convoca a terceira edición do concurso gastronómico “Pincha no Lázaro”

O prazo de inscrición estará aberto ata o 2 de marzo de 2026.

Verín, 24 de febreiro de 2026. O Concello de Verín, a través da concellería de Feiras, Transporte e Xuventude, organiza a terceira edición do concurso gastronómico “Pincha no Lázaro”, unha iniciativa que continúa a promocionar a cultura gastronómica e o sector hostaleiro da vila, fomentando a innovación, a calidade e o uso de produtos locais. O certame celebrarase os días 19, 20 e 21 de marzo, coincidindo coa festividade do Lázaro 2026 .

Segundo explicou Manuel Lorenzo, responsable da área de Feiras, Transportes e Xuventude, esta terceira edición chega avalada polos excelentes resultados dos anos anteriores. «O “Pincha no Lázaro” consolidouse como unha das propostas con mellor acollida dentro da programación do Lázaro. Na pasada edición servíronse 4.735 pinchos en tres días, unha cifra que amosa a implicación da nosa hostalaría e a resposta masiva do público. Queremos seguir reforzando esta iniciativa, apostando pola calidade, pola creatividade e pola promoción da gastronomía local como un dos grandes atractivos de Verín nestas datas.»

Participación e inscrición
Poderán participar no concurso todos os establecementos hostaleiros de Verín que dispoñan da correspondente licenza de apertura en vigor .

O prazo de inscrición estará aberto do 24 de febreiro ao 2 de marzo de 2026, ambas datas incluídas. A inscrición poderá formalizarse enviando un correo electrónico a omic@verin.gal ou presencialmente na OMIC (Casa da Xuventude).

No momento da inscrición será necesario achegar os datos completos do establecemento, teléfono de contacto, nome do pincho, listado de ingredientes, fotografía e os días e horario de degustación. O horario mínimo establecido será de 12:00 a 14:00 horas e de 20:00 a 22:30 horas .

Cada local poderá presentar un único pincho, que terá un prezo fixo de 2,50 euros, sendo motivo de descualificación o incumprimento desta condición . Ademais, será obrigatorio indicar de forma visible os ingredientes para evitar posibles problemas relacionados con alerxias ou intolerancias alimentarias.

Sistema de votación
O concurso contará cun xurado técnico, que visitará os establecementos de forma anónima para valorar os pinchos segundo tres criterios: sabor, presentación e dificultade na elaboración (puntuación de 1 a 5) .

Paralelamente, haberá un xurado popular. As persoas consumidoras que degusten o pincho poderán cubrir unha papeleta coa súa valoración (de 1 a 5), indicando os seus datos persoais e depositándoa nun buzón habilitado en cada local participante . Non poderán votar familiares directos dos establecementos.

As urnas serán retiradas o domingo pola mañá e o reconto das papeletas realizarase o 22 de marzo, levantándose acta co fallo definitivo do concurso.

Premios
O establecemento gañador recibirá un diploma acreditativo como campión do terceiro concurso gastronómico do Lázaro, ademais de recoñecementos específicos ao mellor sabor, mellor presentación e maior dificultade na elaboración.

No caso do público participante, sortearanse diversos premios entre todas as papeletas recibidas,:

1º PREMIO | Concello de Verín: un vale de 100€ para gastar nos establecementos participantes.

2º PREMIO: un xamón doado por Antonio Martín.

3º PREMIO: un estuche de viño doado por D.O. Monterrei.

4º PREMIO: un termo de alimentos sólidos doado por Tien 21.

5º PREMIO: un estuche de viño doado por D.O. Monterrei.

6º PREMIO: Un Bono regalo para escapada termal de Chaves.

7º PREMIO: un lote de produtos gourmet.

8º PREMIO: unha cesta de artesanía variada galega feita a man.

• O sorteo das papeletas realizarase ás 13:30 horas no que se lle comunicará aos gañadores a través dunha chamada telefónica, e a entrega de premios farase ás 19:00 horas presencialmente no stand do Concello de Verín.

A participación no concurso implica a aceptación íntegra das bases e do fallo do xurado. O Concello de Verín resérvase o dereito de modificar as bases ou deixar deserta a convocatoria se non se cumpre a finalidade do certame .

Para máis información, as persoas interesadas poden consultar as bases completas na web municipal ou contactar a través do correo electrónico omic@verin.gal.