Ofertas de Emprego Laboral Temporal
14/07/2026
O Torneo 3×3 Verín reunirá durante tres días ao fútbol base na Praza García Barbón
16/07/2026
O convenio reforza o compromiso de ambas entidades coa organización dun dos principais eventos de promoción da Denominación de Orixe Monterrei.
Verín, 15 de xullo de 2026.
O alcalde de Verín, Gerardo Seoane, e o presidente do Consello Regulador da Denominación de Orixe Monterrei, Manuel Vázquez Losada, asinaron hoxe o convenio de colaboración entre ambas entidades para a organización da XIX Feira do Viño de Monterrei, que se celebrará os días 7, 8 e 9 de agosto. O acordo consolida, un ano máis, a cooperación institucional para facer posible unha cita xa plenamente consolidada no calendario enoturístico galego e un dos principais escaparates dos viños da comarca.
A través deste convenio, o Concello de Verín e o Consello Regulador distribúen as responsabilidades organizativas co obxectivo de garantir o correcto desenvolvemento do evento e ofrecer unha experiencia de calidade tanto ás adegas participantes como ao público asistente.
O Consello Regulador asumirá, entre outras cuestións, a instalación das tendas cónicas e dos stands destinados ás adegas e entidades participantes, así como a organización dos showcookings e catas mediante a participación de cociñeiros e sumilleres especializados, ademais da designación do pregoeiro da feira.
Pola súa banda, o Concello de Verín será o responsable de parte da loxística e infraestruturas necesarias para a celebración do evento, encargándose da reserva e acondicionamento dos espazos públicos, da programación musical, das instalacións de auga e electricidade, da seguridade, da limpeza, da colocación de mobiliario e zonas de sombra, así como a colaboración na promoción e difusión da feira, entre outras actuacións.
A colaboración entre ambas institucións permite continuar fortalecendo unha feira que, edición tras edición, se consolida como un referente na promoción da Denominación de Orixe Monterrei, contribuíndo á dinamización económica, turística e social de Verín e da comarca.
A XIX Feira do Viño de Monterrei reunirá novamente ás adegas da denominación nun espazo pensado para poñer en valor a calidade dos seus viños, acompañado dun completo programa de actividades gastronómicas, divulgativas e musicais dirixidas a todos os públicos.
