O Concello de Verín expresa o seu pesar polo falecemento de Vicente Gómez, alcalde de Castrelo do Val

O Concello de Verín expresa o seu fondo pesar polo falecemento de Vicente Gómez, alcalde de Castrelo do Val, e traslada as súas máis sinceras condolencias á súa familia, amizades, á Corporación Municipal de Castrelo do Val e a todos os seus veciños e veciñas.

Vicente Gómez desenvolveu unha ampla traxectoria ao servizo da cidadanía e do municipalismo. Iniciou a súa andaina política no Concello de Verín en 1989 como concelleiro, responsabilidade que desempeñou tamén tras as eleccións municipais de 1991, asumindo posteriormente a Concellería de Obras e Urbanismo. En 1995 encabezou por primeira vez a candidatura socialista en Verín, pasando a exercer labores de oposición durante ese mandato. Anos máis tarde, en 2005, asumiu a Alcaldía de Castrelo do Val, á fronte da cal permaneceu durante máis de dúas décadas. Desde 2007 revalidou de maneira consecutiva a confianza da veciñanza con cinco maiorías absolutas e, desde 2015, compatibilizou esta responsabilidade co seu labor como deputado provincial.

Nestes momentos de dor, o Concello de Verín únese ao loito de Castrelo do Val e de toda a comarca de Monterrei pola perda dun servidor público que dedicou boa parte da súa vida ao seu municipio, deixando unha fonda pegada na vida institucional da comarca.

Descanse en paz.