A careta do Obradoiro do Cigarrón completa o aforo e mantense aberta a inscrición para a confección do traxe

A elaboración da careta do Obradoiro do Cigarrón 2026-2027 completou xa o seu aforo, mentres que a confección do traxe mantén prazas dispoñibles. O prazo de inscrición continúa aberto ata o venres 2 de outubro para quen queira participar nesta segunda modalidade.

O prazo de inscrición abriuse esta mesma mañá e a boa acollida da convocatoria esgotou nas primeiras horas as 24 prazas previstas para a talla e montaxe da careta, unha das partes máis demandadas do obradoiro.

Seguen dispoñibles prazas para a confección do traxe, a modalidade que abrangue as labores de costura, calceta e gancho. As persoas interesadas deberán contar con coñecementos de confección con máquina e achegar a súa propia máquina de coser ás sesións, ademais de coñecementos de punto con agulla de calcetar e de tecido con agulla de gancho.

As actividades comezarán o 5 de outubro na Casa da Xuventude e desenvolveranse nunha sesión semanal, entre o luns e o xoves, na franxa das 16:00 ás 19:30 horas, ata completar os obxectivos fixados ao inicio do curso e sempre antes do Xoves de Compadres de 2027.

Promovido polo Concello desde 1997, o Obradoiro do Cigarrón ten como obxectivo preservar as formas tradicionais da máscara máis representativa do Entroido de Verín e transmitir os saberes artesanais vinculados á súa elaboración.