Leandro Lamas e a mocidade de Verín crean un mural colectivo polas Letras Galegas
28/05/2026
A Revolta Irmandiña activa a comarca tamén desde a gastronomía con propostas para toda a fin de semana
29/05/2026
A proposta musical reuniu ao alumnado de secundaria pola mañá e ao público xeral nunha segunda sesión pola tarde na Casa da Cultura.
Preto de 200 alumnos e alumnas de secundaria participaron na sesión matinal do espectáculo “INDÓMITAS: Cancións Begoñísimas”, protagonizado por Uxía Senlle e celebrado onte no Auditorio Municipal de Verín dentro da programación das Letras Galegas 2026.
O concerto reuniu alumnado do IES Castro de Baronceli, IES Xesús Taboada Chivite, CPR Plurilingüe María Inmaculada e CPR Apostólico Mercedario, que tiveron a oportunidade de achegarse á figura e ao legado de Begoña Caamaño a través dunha proposta artística especialmente deseñada para esta conmemoración.
Acompañada pola arpista Bleuenn Le Friec, Uxía ofreceu un formato íntimo no que música, literatura e memoria se entrelazaron para render homenaxe á escritora e xornalista á que este ano se lle dedica o Día das Letras Galegas.
“INDÓMITAS: Cancións Begoñísimas” constitúe unha homenaxe ás mulleres que loitan, crean e resisten, ao tempo que reivindica a amizade, a sororidade e a memoria colectiva como elementos fundamentais da construción dunha sociedade máis xusta. A través dun repertorio especialmente composto para esta ocasión, a artista viguesa achegou ao público máis novo a dimensión humana e literaria dunha das voces máis relevantes da cultura galega contemporánea.
A concelleira de Turismo, Cultura e Festexos, Samanta Barreira, destacou a importancia de achegar este tipo de propostas ao alumnado, sinalando que «as Letras Galegas son unha oportunidade extraordinaria para conectar ás novas xeracións coa nosa literatura e coa nosa lingua a través de formatos atractivos e emocionais que lles permiten descubrir referentes fundamentais da cultura galega».
Xa pola tarde, o Salón de Actos da Casa da Cultura acolleu unha segunda representación aberta ao público xeral, completando unha das actividades máis destacadas da programación municipal das Letras Galegas 2026.
