O Concello de Verín amplía as prazas do Obradoiro do Cigarrón ante a gran acollida desta nova edición

Verín, 28 de setembro de 2026. O Concello de Verín amplía o número de prazas dispoñibles para o Obradoiro do Cigarrón 2026-2027 como resposta á gran acollida e ao interese suscitado por esta nova edición da iniciativa, que busca contribuír á conservación e transmisión dos saberes artesanais vinculados ao Entroido verinés.

Deste xeito, increméntanse en 12 as prazas destinadas á elaboración da careta, pasando das 24 inicialmente previstas ás 36 actuais, e en 10 as correspondentes á confección do traxe, que pasan de 20 a 30 prazas.

A concelleira de Cultura, Festexos e Turismo, Samanta Barreira, destacou a satisfacción do Concello pola resposta que está a ter esta nova edición do obradoiro. «O Entroido de Verín é unha parte fundamental do noso patrimonio cultural, e iniciativas como esta son importantes para garantir que os coñecementos e os oficios asociados a esta tradición non se perdan».

O obradoiro, promovido polo Concello de Verín desde 1997, está dirixido a persoas maiores de idade interesadas en aprender a elaborar a máscara completa do Cigarrón ou algunha das súas partes. A formación céntrase na preservación das formas tradicionais desta figura, a máis representativa do Entroido de Verín, e aborda a elaboración dos seus diferentes elementos, agás aqueles compoñentes de produción industrial e o pintado da careta e da mitra.

As actividades desenvolveranse na Casa da Xuventude a partir do 5 de outubro e prolongaranse ata que as persoas participantes e formadoras completen os obxectivos establecidos ao inicio do curso, sempre antes do Xoves de Compadres de 2027.

Para cada modalidade está prevista unha sesión semanal, entre o luns e o xoves, dentro da franxa horaria das 16:00 ás 19:30 horas. Os horarios e o número de sesións poderán adaptarse de mutuo acordo entre as persoas participantes e formadoras, dentro das posibilidades de apertura das instalacións.

As persoas participantes deberán achegar os materiais e instrumentos necesarios para desenvolver as actividades. No caso da confección do traxe, será preciso contar con coñecementos de costura con máquina, labores de punto con agulla de calcetar e tecido con agulla de gancho, ademais de levar a propia máquina de coser para traballar nela durante as sesións.

A inscrición poderá realizarse para o conxunto do obradoiro ou unicamente para unha das súas partes. Tamén se admite a participación conxunta de dúas persoas que acrediten parentesco de ata cuarto grao para elaborar a máscara completa; neste caso, unha participará na confección do traxe e a outra na realización da careta.

O prezo da inscrición será de 120 euros para o conxunto das actividades, tanto na modalidade individual como na compartida por dúas persoas con parentesco acreditado, e de 85 euros para participar exclusivamente na elaboración do traxe ou da careta.

As inscricións poderán presentarse a partir do mércores 30 de setembro, ás 09:00 horas, presencialmente no Rexistro de Entrada do Concello de Verín ou a través da Sede Electrónica municipal (os formularios para a tramitación electrónica estarán dispoñibles no Taboleiro de Anuncios da propia Sede Electrónica).

Será imprescindible achegar o formulario correspondente debidamente cuberto e o xustificante de ingreso ou transferencia bancaria. O prazo de inscrición permanecerá aberto ata o venres 2 de outubro ás 14:00 horas.

As prazas cubriranse por estrito orde de rexistro das solicitudes, ata esgotar as prazas dispoñibles para cada unha das modalidades.

Con esta iniciativa, o Concello de Verín continúa facilitando a aprendizaxe dos oficios e técnicas que permiten manter viva unha das expresións máis singulares do patrimonio cultural da vila, ao tempo que responde ao interese da cidadanía por coñecer e preservar os saberes ligados á elaboración do Cigarrón.