O Obradoiro do Cigarrón 2026-2027 completa o aforo nas dúas modalidades o primeiro día de prazo

O Obradoiro do Cigarrón 2026-2027 completou o seu aforo nas dúas modalidades o mesmo día da apertura do prazo. Tras esgotarse pola mañá as prazas para a elaboración da careta, tamén quedaron cubertas as da confección do traxe, polo que a inscrición queda pechada.

A convocatoria tiña previstas 24 prazas para a talla e montaxe da careta e 20 para a confección do traxe, ata un total de 44. Todas elas quedaron cubertas ao longo desta xornada, o primeiro día do prazo, que en principio permanecería aberto ata o 2 de outubro.

O Concello de Verín agradece a resposta da veciñanza a unha convocatoria que confirma o interese pola aprendizaxe dos oficios vinculados á máscara máis representativa do Entroido verinés.

As actividades comezarán o 5 de outubro na Casa da Xuventude e desenvolveranse nunha sesión semanal por modalidade, entre o luns e o xoves, na franxa das 16:00 ás 19:30 horas. O obradoiro rematará cando as persoas participantes e formadoras completen os obxectivos fixados ao inicio do curso e, en todo caso, antes do Xoves de Compadres de 2027.

Promovido polo Concello desde 1997, o Obradoiro do Cigarrón ten como obxectivo preservar as formas tradicionais do cigarrón e transmitir os saberes artesanais vinculados á súa elaboración, agás os compoñentes de produción industrial e o pintado da careta e da mitra.