O pleno aproba unha modificación de crédito destinada a reforzar os servizos municipais
08/07/2026
A cultura urbana volverá tomar as rúas de Verín coa oitava edición do Extruga festival
09/07/2026
Un centenar de nenos e nenas da Ludoteca Municipal e do Campamento Urbano Junior do Concello de Verín participaron hoxe nunha xornada de educación para o consumo responsable organizada polo Instituto Galego do Consumo e da Competencia (IGCC), desenvolvida nas instalacións do CEIP Princesa de España.
A concelleira de Benestar Social, Rosario Rodríguez, asistiu ao desenvolvemento das actividades e destacou a importancia de incorporar este tipo de iniciativas á programación estival municipal, favorecendo que a infancia adquira hábitos de consumo responsables a través de metodoloxías lúdicas e participativas.
A xornada desenvolveuse mediante dúas propostas adaptadas ás diferentes idades. Os nenos e nenas de entre 3 e 6 anos participaron na actividade «Xogueteando: un lecer diferente», unha iniciativa baseada no xogo colaborativo que lles permitiu descubrir a importancia dun consumo responsable, dun lecer activo e do uso de xoguetes seguros e libres de riscos.
Pola súa banda, os participantes de entre 7 e 13 anos tomaron parte na «Ximcana do consumo responsable», unha dinámica por equipos na que tiveron que superar diferentes probas relacionadas co consumo sostible e consciente, coñecendo tamén os dereitos e deberes das persoas consumidoras.
Ambas actividades combinaron o compoñente educativo co lúdico, promovendo a aprendizaxe colaborativa e a participación activa dos menores mediante xogos e retos adaptados a cada grupo de idade.
Esta iniciativa forma parte da programación da Ludoteca Municipal e do Campamento Urbano Junior, dous servizos impulsados polo Concello de Verín a través da Área de Benestar Social para favorecer a conciliación da vida familiar e laboral durante o período estival. Ademais de ofrecer unha alternativa de lecer educativo e seguro durante as vacacións escolares, estes programas incorporan ao longo do verán actividades de sensibilización sobre hábitos saudables, educación ambiental, consumo responsable e valores de convivencia.
Desde o Concello de Verín agradecen ao Instituto Galego do Consumo e da Competencia a súa colaboración nesta iniciativa, que permite achegar aos máis pequenos ferramentas para desenvolver unha actitude crítica, responsable e sostible no seu día a día.
